A Xunta garante a continuidade das Axudas Extraordinarias ao Emigrante Retornado, que se poden solicitar ata o 31 de agosto

O Consello da Xunta autorizou a seguir coa tramitación da orde, que consiste nun pago único que busca axudar ás e aos que retornan a Galicia a facer fronte aos gastos derivados da súa volta.

As familias con nenas e nenos menores de idade recibirán 1.000 euros por cada un das e dos dous primeiros e 1.500 euros polo terceiro e sucesivos. 

  • Alberto Núñez Feijóo, na rolda de prensa posterior ao Consello da Xunta
    Alberto Núñez Feijóo, na rolda de prensa posterior ao Consello da Xunta
  • Alberto Núñez Feijóo, na rolda de prensa posterior ao Consello da Xunta
    Alberto Núñez Feijóo, na rolda de prensa posterior ao Consello da Xunta
  • Alberto Núñez Feijóo, na rolda de prensa posterior ao Consello da Xunta
    Alberto Núñez Feijóo, na rolda de prensa posterior ao Consello da Xunta
Listen to this page using ReadSpeaker
Santiago de Compostela, 22 de maio de 2020.

O Consello da Xunta vén de garantir a continuidade da convocatoria das Axudas Extraordinarias ao Emigrante Retornado da Secretaría Xeral da Emigración, cuxo prazo de solicitudes remata o 31 de agosto. Poden acollerse a esta convocatoria as galegas e galegos que regresaran á comunidade desde o exterior nos últimos dous anos, xa que esta convocatoria busca darlles un apoio para que poidan facer fronte aos gastos extraordinarios derivados da súa volta a Galicia. Trátase dun pago único que conta cun orzamento total de 1,9 millóns de euros. O obxectivo desta orde do Goberno galego, que se mantén aberta desde o pasado 17 de marzo, é facilitar o retorno a aquelas e aqueles galegos que queiran regresar á súa terra, e inclúe un complemento de 1.000 euros para as familias por cada filla ou fillo menor de idade ata o segundo, e de 1.500 para o terceiro e sucesivos.

A solicitude destas axudas pode realizarse a través da sede electrónica da Xunta de Galicia ou presencialmente no  Rexistro ordinario da Xunta. As persoas interesadas poden obter información no Portal Retorna da web da Secretaría Xeral da Emigración, Galicia Aberta - emigracion.xunta.gal, e nas propias sedes da Oficina Integral de Asesoramento e Seguimento ao Retornado, situadas en Santiago, A Coruña, Lugo, Ourense e Vigo, que seguen a atender e asesorar ao público a través do correo electrónico e do teléfono.

1238 lecturas