“México segue a ser sinónimo de esperanza para os galegos”, salienta Miranda na visita á capital azteca

O secretario xeral da Emigración analizou coa representación das institucións do Estado a coordinación a prol da colectividade no Exterior.

Participará mañá, tamén na capital, na celebración do Primeiro de Maio, unha das manifestacións máis relevantes da Galeguidade.

Secretaría Xeral da Emigración - Xunta de Galicia
Secretaría Xeral da Emigración - Xunta de Galicia
Listen to this page using ReadSpeaker
Santiago de Compostela, 30 de abril de 2013.

Tras pasar as últimas xornadas coñecendo os centros sociais e asistenciais vinculados ás comunidades galegas en Venezuela e Brasil, o secretario xeral da Emigración, Antonio Rodríguez Miranda, chega hoxe a México, onde ten previsto ao longo da xornada entrevistarse con representantes do tecido empresarial galego afincado no país, e coñecer a sede central do Centro Gallego da capital, un dos baluartes fundamentais da Galeguidade no mundo.

Miranda comeza o seu periplo azteca -é a primeira vez que visita oficialmente os Estados Unidos de México- contactando con algunhas e algúns emprendedores galegos con negocios no país, algúns dos cales sitúanse nos postos máis destacados nos respectivos sectores produtivos. A estes empresarios e empresarias Miranda quere transmitir a intención que ten o Goberno galego de alimentar as xa boas relacións nas dúas beiras do Atlántico, nun dobre sentido: o de seguir avanzando no acceso aos mercados exteriores para as empresas galegas, e o de buscar novos investimentos mexicanos na Galicia territorial. Así llo transmitiu tamén ao presidente da Umegal (Unión Mexicana de Empresarios Galegos), Antonio Cortés.

O máximo responsable autonómico en materia de Emigración salientou que “México segue a ser sinónimo de esperanza para os galegos, pois a Historia demostra que no país azteca a diáspora atopou boas oportunidades para se implantar e medrar”. Aínda que México ocupa o posto undécimo entre os países do estranxeiro en número de galegos e galegas residentes (con algo máis de 11.000, un 2’5 por cento da cidadanía galega do Exterior), a viveza da colonia galega déixase sentir no ritmo e pulso do país, e moi nomeadamente no Distrito Federal.

Na Embaixada
Tralo encontro con Cortés, Miranda visitou ao conselleiro de Emprego e Seguridade Social da Embaixada de España en México, Carlos Manuel Moyano, con quen avaliou a situación actual da colonia galega, e tamén as necesidades e inquedanzas que as e os emigrantes transmiten á legación nacional. Inmediatamente despois, tivo oportunidade de saudar tamén ao embaixador, Manuel Alabart Fernández Cavada. Con ambos estudou a coordinación de actuacións entre as administracións autonómica e estatal en prol da colectividade no Exterior.

Centro Gallego
Miranda ten previsto xa á tardiña [madrugada do martes en Galicia] visitar a sede central do Centro Gallego de México, presidido por Luis Piñeiro, con máis dun século de existencia, e un dos grandes referentes da Galeguidade no mundo pola súa sostibilidade social e económica, ademais de polo seu carácter de institución formadora e solidaria entre os galegos e as galegas residentes en toda a nación azteca.

Posúe unha sede central de case 4.000 metros cadrados sita nun antigo pazo de mediados do pasado século, con diversas instalacións culturais e recreativas, entre elas un salón multiusos de máis de 1.500 metros cadrados. Miranda visitará estas instalacións centrais antes de reunirse coa xunta directiva da institución.

Ademais, o Centro tamén é propietario doutra parcela a corenta quilómetros do centro da cidade, de índole máis lúdica e deportiva, con cen mil metros cadrados. É alí, precisamente, onde mañá mércores terá lugar a celebración do Primeiro de Maio, unha das manifestacións festivas máis relevantes da axenda da Galeguidade, á que se prevé que acudan, como cada ano, máis de 4.000 persoas. Entre elas, e nesta ocasión, estará presente o secretario xeral da Emigración.

1501 lecturas