A Secretaría Xeral da Emigración vén de publicar no día de hoxe a adxudicación definitiva dos 40 obradoiros que se organizarán en colaboración das entidades galegas do exterior. 

Esta iniciativa ten por finalidade ofrecer formación en folclore, artesanía, cociña e seminarios de cultura galega ás galegas e galegos vinculados ás entidades do exterior co obxectivo de preservar a tradición, cultura e gastronomía da nosa comunidade. 

Nesta nova edición, logo de terse superadas as restricións sanitarias en todos os países do mundo, as actividades, que darán comezo este mes de setembro, volverán impartirse de forma presencial, salvo no caso dos seminarios de cultura galega, que serán telemáticos. 

Baile, gaita, percusión, pandeireta e canto, encaixe de palillos, confección de traxe galego, cociña e cultura galega son algúns dos obradoiros entre os que as entidades puideron elixir un total de tres co seu respectivo formador ou formadora. Deste xeito, e cun investimento de 150.000 euros, resultaron beneficiarias 19 entidades de América, 17 de España e 4 de Europa.