A Secretaría Xeral da Emigración recuperou en 2021 as actividades formativas para os galegos e galegas do exterior en colaboración con 36 centros, tanto de Europa como de América, impulsando a realización de obradoiros de promoción e apoio á cultura galega en diversas entidades.

Esta iniciativa permitiu desenvolver talleres de folclore, artesanía, cociña e seminarios de cultura galega, e que se puideron desenvolver, por primeira vez, en dúas modalidades: on line e presencial, que permitiron formar a case 1.000 persoas.

En total, realizáronse 27 obradoiros de folclore, un de encaixe de palillos, cinco de cociña galega e tres seminarios de cultura. Para este fin destináronse un total de 150.000 euros.  

A modalidade presencial destes obradoiros desenvolveuse nas instalacións dos centros con tódalas medidas de seguridade sanitaria, creándose, a maiores, por primeira vez, a modalidade telemática a través da  aula virtual, unha plataforma onde a persoa formadora e o alumnado interactúan, de xeito concorrente e en tempo real, a través dun sistema de comunicación telemática. En ambos casos, os cursos foron impartidos por profesionais con recoñecida experiencia nas distintas modalidades.