Rodríguez Miranda lembrou que "a plena integración non significa renunciar ás raíces"

O secretario xeral da Emigración da Xunta de Galicia participou no 25º aniversario da AEGU.

Un momento da intervención de Miranda no acto de entrega das 'Compostelas'
Un momento da intervención de Miranda no acto de entrega das 'Compostelas'
Listen to this page using ReadSpeaker
Montevideo, 9 de decembro de 2014.

Na segunda xornada da súa viaxe a Arxentina e Uruguai, o secretario xeral de Emigración, Antonio Rodríguez Miranda, entregou as compostelas (acreditacións oficiais de ter realizado o Camiño de Santiago) -as mozas e aos mozos galegos de Uruguai participantes na edición de 2014 do programa 'Conecta con Galicia', da Secretaría.

Durante o acto, que tivo lugar no Centro Ourensán de Montevideo e contou coa presenza de numerosas e numerosos familiares das e dos rapaces, fíxose entrega dunha placa de recoñecemento a Ismael Martínez, a persoa encargada nos últimos anos da divulgación e difusión dende a Casa de Galicia de Montevideo dos programas do departamento que dirixe Rodríguez Miranda.

25 anos de AEGU
Xa ao atardecer, o máximo responsable autonómico en materia de Emigración acudiu, en representación do presidente a Xunta, Alberto Núñez Feijóo, ao evento de celebración dos 25 anos da Asociación de Empresarios de Galicia no Uruguai (AEGU), que combinou de xeito equilibrado o aspecto lúdico e festivo coa rigorosidade que esixe un acto de tal relevancia económica, social e mesmo política en Uruguai.

A celebración tivo como colofón a exhibición dunha colección de instantáneas que repasan a historia da institución, e tamén o visionado dun saúda audiovisual realizado para a ocasión polo presidente Feijóo, no que animaba á colectividade galega nese país a avanzar xunta na consecución de obxectivos cada vez máis ambiciosos.

Durante a súa intervención ante as persoas presentes, Rodríguez Miranda agradeceu o traballo levado a cabo, e as perspectivas de futuro de AEGU, e recordou que "para chegar a este punto fixo falta o esforzo e sacrificio de moitos dos presentes nesta gala, pero tamén de moitos que hoxe xa non están connosco", alusión que foi recibida con especial aprobación polo auditorio, composto por empresarias e empresarios galegos pero tamén españois e españolas en xeral, e moitos moitas con orixe propiamente uruguaia.

Acoller e ser acollidos e acollidas
Miranda recordou que o presente e o pasado de Galicia "están marcados polo Camiño de Santiago, vela fundamental no corpo de Europa e da Cristiandade, que nos ensinou a recibir a todos os pobos do mundo. Así, estaba no noso ADN a capacidade para aproveitar o mellor de cada cultura e asumila, de acoller e ser acollidos, como sen dúbida o foron de xeito case exemplar a maioría dos nosos paisanos neste país irmán que é o Uruguai".

O secretario xeral tamén dixo que "esa plena integración non significa renunciar ás raíces, senón traballar arreo polo ben do país de acollida, como fai AEGU, e ao tempo recordar o lugar de orixe e axudar, na medida do posible, ao seu desenvolvemento mesmo na distancia". A tal respecto, asegurou Miranda, "AEGU realiza un traballo exemplar do que hoxe celebramos unha data especial. Pero estou seguro de que non será a última que celebre forte, unida, e con garantías de futuro. E toda a Galeguidade, do mesmo xeito que a Administración autonómica galega, o celebra e se sente satisfeita e orgullosa do voso labor" afirmou.

 

Fonte e foto: Crónicas de la Emigración

916 lecturas