O secretario xeral de Emprego e Relacións Laborais, Pablo Fernández, recibiu hoxe unha delegación da Asociación de Empresarios Galegos do Uruguai (AEGU). No encontro que tivo lugar na sede da Secretaría Xeral da Emigración, agradeceu o seu compromiso coa captación de investimentos e talento, salientando a importancia do seu traballo para fortalecer os lazos económicos entre Galicia e O Uruguai.

Así, o secretario xeral destacou o papel activo da AEGU xerando redes de apoio para profesionais e emprendedores dentro e fóra do Uruguai e, nesa liña, hoxe mesmo puideron coñecer diferentes negocios establecidos na capital galega. Fernández apostou por seguir estreitando vínculos e reforzando as vías de colaboración coa entidade como clave para proxectar Galicia no mundo e favorecer o retorno e a cooperación económica.