O secretario xeral da Emigración, Antonio Rodríguez Miranda, inicia mañá, 7 de febreiro, unha visita a Arxentina e Uruguai para achegarse aos galegos e galegas residentes nestes países e trasladarlles as novidades coas que conta a nova Estratexia Galicia Retorna (ERG2026) especialmente no eido laboral. 

Deste xeito, Rodríguez Miranda explicará nas capitais de ambos países o novo documento de apoio ao retorno que se basea na experiencia da primeira Estratexia Retorna, que agora se verá duplicada tanto no orzamento inicial como nas medidas a aplicar polo conxunto de todos os departamentos galegos, que roldará ás 100 iniciativas. 

Especialmente novidoso, dentro da ERG2026, é o programa Retorna Cualifica Emprego, que quere casar as vacantes das empresas coas necesidades laborais das persoas retornadas. A través desta iniciativa, a Xunta ten previsto que máis de 400 galegas e galegos do exterior con formación, tanto de América como de Europa, regresen a Galicia este ano cun contrato indefinido na man, ademais de dispor de asesoramento e tutela na súa nova andaina. 

Miranda aproveitará a visita tamén para inaugurar unha mostra fotográfica de Manuel Valcárcel en Córdoba sobre o Camiño de Santiago e para presidir, tanto en Bos Aires como en Montevideo, a entrega dos diplomas e as compostelas dos galegos e galegas de ambos países que participaron o ano pasado nos programas Reencontros e Conecta co Xacobeo.