Miranda traslada o apoio do Goberno galego ás entidades de Cataluña ante a delicada situación social que están a vivir

O secretario xeral da Emigración mantén un encontro con representantes da Xuntanza de Asociacións Galegas de Cataluña. 

Amosa a súa preocupación pola realidade actual das galegas e os galegos que residen en Cataluña ante o conflito aberto polo independentismo.

Imaxe da reunión celebrada na sede da Secretaría Xeral da Emigración na capital de Galicia
Imaxe da reunión celebrada na sede da Secretaría Xeral da Emigración na capital de Galicia
Listen to this page using ReadSpeaker
Santiago de Compostela, 26 de novembro de 2019.

O secretario xeral da Emigración, Antonio Rodríguez Miranda, mantivo un encontro con representantes da Xuntanza de Asociacións Galegas de Cataluña, a quen lles trasladou o apoio do Goberno galego ante a delicada situación social que están a vivir. 

Neste marco, o titular do departamento autonómico reiterou a súa preocupación polo conflito aberto polo independentismo e as súas consecuencias sociais, que afectan directamente o día a día das galegas e os galegos e das entidades galegas en Cataluña.  

Durante o encontro, abordáronse tamén as previsións das entidades galegas para o vindeiro exercicio, aproveitando o secretario xeral na necesidade de incidir na unidade das mesmas para o seu fortalecemento. Non en van, a Xuntanza de Asociacións Galegas de Cataluña, presidida por Xosé Carlos García González, é un bo exemplo disto ao estar integrada pola Agrupación Cultural Agarimos de Badalona, a Asociación Amigos de San Froilán, a Asociación Cultural Galega Rosalía de Castro de Cornellà e a Casa Galega L’Hospitalet.  

“A Xuntanza representa todas as bondades do asociacionismo, permitindo fortalecer os vínculos e reforzar o importante papel social e cultural que xogan en Cataluña as nosas entidades, dando voz á diversidade identitaria e cultural dos galegos na comunidade autónoma e fomentando a participación na súa vida social”, sinalou o titular da Secretaría Xeral da Emigración.

3.750 galegas e galegos menos en tres anos
No conxunto da comunidade autónoma catalá están censadas e censados, segundo os datos do Instituto Nacional de Estatística a 1 de xaneiro de 2019, un total de 69.058 cidadás e cidadáns galegos nacidos en Galicia, máis de 1.200 menos ca en 2018, cando había 70.277; máis de 2.500 menos ca en 2017, cando eran 71.564; e 3750 menos que no 2016, cando a cifra ascendía aos 72.808. 

En imaxes
203 lecturas