O secretario xeral da Emigración, Antonio Rodríguez Miranda, mantivo hoxe un encontro con Braulio Míguez Figueroa, vicepresidente da Casa de Galicia en Las Palmas de Gran Canaria, no que destacaron a importancia do traballo que esta entidade leva desenvolvendo durante décadas para manter viva a cultura e as tradicións galegas no arquipélago canario. Durante a reunión, abordáronse novas iniciativas para reforzar o apoio aos galegos residentes na zona, especialmente no ámbito cultural.

Rodríguez Miranda agradeceu a dedicación da Casa de Galicia en Las Palmas como ponte entre Galicia e as Illas, subliñando o seu papel clave á hora de facilitar o arraigamento dos galegos fora da comunidade sen perder o vínculo coa súa terra de orixe. Así mesmo, convidou á entidade a continuar promovendo proxectos que permitan á mocidade galega coñecer e implicarse activamente nas actividades da colectividade, contribuíndo así a manter viva a cultura galega en Gran Canaria. Rodríguez Miranda interesouse tamén por como se desenvolveu este ano a tradicional Cabalgata de Reis que, desde hai anos, organiza a Casa de Galicia en Las Palmas. Este evento, que conta cunha gran participación e recoñecemento na cidade, é unha das iniciativas máis emblemáticas da entidade.