O Pleno do Ayuntamiento de Las Palmas de Gran Canaria aprobou propoñer a candidatura da Casa de Galicia da capital grancanaria para os Premios Canarias 2016, que outorga o Goberno Canario, na súa modalidade de 'Accións Altruístas e Solidarias'.

A Casa de Galicia celebrará en maio de 2016 o seu 65º aniversario de permanencia na cidade, anos ao longo dos que destacou pola súa colaboración coas institucións locais e a súa solidariedade coa cidadanía canaria. Dende un ano despois da súa fundación celebrou, cada ano, a tradicional Cabalgata de Reis no municipio, primeiro con recursos propios e máis adiante con colaboracións públicas e privadas e do propio Ayuntamiento. Igualmente, foron encargados durante máis de sesenta anos da campaña de recollida benéfica de xoguetes para a noite de Reis.

Durante os anos de crise económica, ademais, a Casa de Galicia desenvolveu accións de recollida e distribución de alimentos e produtos de primeira necesidade, polo que esta entidade se converteu durante anos en referente de axuda solidaria para ONG's e institucións públicas.

Ao longo da súa historia, recibiron múltiples distincións en recoñecemento ao seu labor. En 2014 a sede da Casa de Galicia sufriu un incendio que destruíu as súas instalacións. A pesar de que a entidade atravesa na actualidade un dos momentos máis difíciles da súa historia, non abandonou o seu labor solidario e social, o que a fai acredora da máxima distinción do Goberno de Canarias para o Ayuntamiento.

Fonte: Ayuntamiento de Las Palmas | Fotos: Casa de Galicia de Las Palmas