O secretario xeral da Emigración, Antonio Rodríguez Miranda, vén de reunir galegos dos principais Estados de Venezuela nunha reunión telemática para dar continuidade ao labor de seguimento que leva a cabo o departamento autonómico de xeito permanente sobre a súa situación. A xuntanza, que se celebrou a través de videoconferencia, busca coñecer de primeira man as necesidades e propostas das galegas e os galegos do exterior que van xurdindo conforme evoluciona a pandemia da COVID-19 nos distintos países e continentes do mundo cunha presenza significativa de cidadás e cidadáns galegos. 

O encontro estivo presidido polo secretario xeral da Emigración e participado por representantes da Hermandad Gallega de Venezuela (Caracas), Hermandad Gallega de Valencia, Centro Gallego de Maracaibo, Centro Gallego de Puerto La Cruz, a Fundación Fillos de Ourense-Fundaourense e a Federación de Centros Españoles en Venezuela.

Miranda aproveitou a ocasión para trasladarlles a preocupación do Goberno galego pola situación dun país con tanta tradición histórica na acollida de emigrantes galegas e galegos no século pasado, e que agora, á complexa situación causada pola pandemia, súmase á propia. Venezuela, que hoxe acubilla 33.278 cidadás e cidadáns galegos, pasou só nos últimos tres anos de ser o terceiro do mundo en presenza galega a converterse no quinto.