O secretario xeral da Emigración, Antonio Rodríguez Miranda, recibiu hoxe a José Carlos Taboada, representante en Galicia da Unión Mexicana de Empresarios Gallegos (Umegal), con quen analizou a situación que está a vivir a colectividade de emprendedoras e emprendedores galegos no país azteca.

Durante a reunión tratáronse as liñas de colaboración para favorecer o retorno dende México a Galicia, en particular, no eido empresarial e emprendedor.

As empresarias e empresarios galegos en México son un colectivo moi activo e que contan con varios sectores especialmente afectados pola pandemia da covid-19, como pode ser o turístico. Esta situación, así como o estado da propia colectividade galega no país americano, centrou o análise de ambos durante o seu encontro.

Umegal é unha asociación de empresarias e empresarios galegos radicados en México fundada en 2007 na Cidade de México. O seu obxectivo é mellorar o benestar da sociedade a través da actuación empresarial, así como fomentar as relacións económicas entre os Estados Unidos Mexicanos e o Goberno de Galicia.