O secretario xeral da Emigración, Antonio Rodríguez Miranda, participou este venres na feira internacional Expo Prado 2025, que se celebra estes días en Montevideo, para apoiar á colectividade galega e acompañar a representantes do empresariado galego presentes na cita.

Acompañado pola delegada da Xunta en Uruguai, Elvira Domínguez, Miranda visitou o Pabellón de España, onde coñeceu diversas iniciativas de promoción empresarial e institucional, e conversou con representantes da colectividade galega vinculados a distintos sectores económicos.

Durante a visita, o secretario xeral puxo en valor “a presenza activa da comunidade galega tamén no ámbito empresarial e produtivo, como exemplo da capacidade de integración, emprendemento e contribución ao desenvolvemento económico dos países de acollida”.

Miranda destacou, así mesmo, o interese da Xunta por reforzar os vínculos comerciais e culturais co Uruguai e por aproveitar estes espazos de encontro como ponte para novas oportunidades de colaboración, tanto para o retorno emprendedor como para a proxección exterior das empresas galegas.