Antonio Rodríguez Miranda, secretario xeral da Emigración, interesouse pola situación dos galegos e galegas de Gran Canaria a través dun encontro con Marisa González Lagarón, membro da directiva desta agrupación, con quen analizou como se viviu na comunidade canaria a evolución da pandemia e a actual situación de reinicio de actividades.  

Ambos destacaron a estreita conexión que o Xacobeo ten entre Galicia e As Palmas, pola celebración tamén do Ano Santo de Santiago de Gáldar, que conta cun santuario no municipio grancanario do mesmo nome. Miranda e Lagarón destacaron a importancia da colaboración entre ambos para a potenciación dos dous eventos. 

Deste xeito, o secretario xeral continúa a retomar o contacto persoal con representantes das diferentes casas e centros galegos de toda España, así como de América e Europa, tras meses de traballo realizado de xeito telemático polas restricións sanitarias impostas pola pandemia. Estes encontros permiten trasladar ás diversas colectividades, neste caso á das Palmas, o interese da Secretaría Xeral da Emigración pola recuperación completa dos proxectos, iniciativas, actividades e funcionamento dos diferentes centros galegos no mundo.