No serán do pasado sábado 16 de agosto, o Centro Galego de Rosario vestiuse de festa e encheu as instalacións do seu auditorio con moito público e participación. O centenario do nacemento do xenial escritor arxentino non pasou desapercibido debido á súa entrañable relación con Galicia. Julio Cortázar, infatigable viaxeiro, doou post mortem, a través da súa primeira esposa e amiga de toda a vida, Aurora Bernárdez, o seu patrimonio fotográfico e fílmico á Comunidade Autónoma de Galicia.

E o acto-espectáculo realizado na cidade arxentina explorou esa relación Cortázar-Galicia. Todo comezou con palabras de benvida do presidente do Centro Galego, Guillermo Picallo Durán, e logo sucedéronse unha serie de segmentos presentados pola xornalista María Laura Nóbrega. A disertación, a cargo da titular de Cultura do devandito Centro, Graciela González Rodríguez, referiu á amizade de Cortázar con galeguistas exiliados que desenvolveron unha profusa actividade cultural en Bos Aires, e o fundamental que foi a aparición de Francisco Porrúa, o editor coruñés, na vida do autor de Rayuela. Ademais, resaltou a introdución da literatura de Cortázar na lingua galega, pechando a súa exposición cun fragmento de A autoestrada do sur, tradución de Francisco Xosé Fernández Naval do consagrado conto do eterno cronopio. Logo, os escritores rosarinos Alejandro Guarino e Marcelo Juan Valenti leron poemas de Julio Cortázar ante unha audiencia silenciosa. O acto continiou cun momento musical a cargo do trío de voces e guitarras composto por Lucila Tolari Guimarey, Pablo Pallares e Nahuel Diviani, que executaron obras latinoamericanas dedicadas ao autor homenaxeado.

Outro segmento de lecturas, seguido moi atentamente polos espectadores e espectadoras, con contos inspirados na obra e a figura cortazariana, estivo a cargo do alumnado e o coordinador do obradoiro de Escritura Creativa que se desenvolve cada sábado na biblioteca Rosalía de Castro da entidade galega. Así, Vilma Gallegos, Katty Camino, Beatriz Elías, Lisandro Romero e Raúl Astorga ofreceron un cadro literario acompañados polas guitarras dos intérpretes musicais anteriores.

Un coffe-break para o público asistente, mentres se acomodaban micrófonos e atrís no escenario, permitiu unha pausa moi breve que deu paso á parte final do encontro. O Conxunto Folclórico de Música (Lucinda Méndez, Silvia Navarro, Celina Miguens, Federico Rubio, Esteban Sánchez) e Baile do Centro (Laura Alvarez, Angeles Astorga, María Laura Galassi, Federico Irurzun, Leandro Barba Palacios) e o grupo de Cantareiras Alumea (Beatriz Camafreita, Haydée González, K. Camiño, V. Galegos, G. González) exhibiron unha fusión de tradición e contemporaneiade que arrincou extensos aplausos da platea. A festa tivo o seu broche de ouro coa intervención especial das actrices Isabel Pisano e Dora Sajevicas e o actor Paulo San Martín -as persoas que realizan o programa de Radio Splendid de Bos Aires 'Las Noches y Los Cuentos'- quen presentaron un programa acorde ao momento, interpretando de xeito particular textos de Julio Cortázar que fascinaron ás e aos espectadores que responderon ovacionando a clausura dunha noite inesquecible. O momento do brinde foi, sen dúbidas, instante de camaradaría, de achegamento e de lembranza dun autor que influíu en xeracións de lectoras e lectores de todo o mundo.