O presidente do Goberno galego, Alberto Núñez Feijóo, anunciou onte que a Xunta vai destinar case 4 millóns de euros para “formar, orientar e insertar laboralmente” a preto de 3.300 desempregados. Segundo concretou, estas axudas irán dirixidas a persoas con discapacidade ou en risco de exclusión social, preceptores de subsidios e prestacións por desemprego da renda activa de inserción ou da renda activa de integración social de Galicia, desempregados de longa duración e mozos.

Feijóo explicou que as entidades beneficiarias serán as corporacións locais e as entidades sen ánimo de lucro que terán a obriga de contratar, como mínimo, entre o 30 e o 35 por cento do persoal ao que previamente formen; polo que considerou que este investimento en formación redundará, como mínimo nun terzo, en contratos de traballo.

Na rolda de prensa tras a reunión do Consello, o mandatario galego reiterou a vontade da Xunta de seguir por este camiño para paliar o desemprego a través de axudas efectivas aos sectores produtivos da nosa economía.

Ampliación da liña de avais para pequenas e medianas empresas
“Hoxe, adoptamos outra liña de avais, incrementando as anteriores, e mantemos o compromiso de avais para pequenas e medianas empresas”, avanzou Feijóo na rolda de prensa tras o Consello, remarcando que isto “supón manter en vigor a maior liña de capital circulante que a Xunta puxo nunca a disposición das empresas”. “E non soamente isto, senón que ampliamos ata 10 puntos máis”, aseverou o mandatario autonómico adiantando que en total se poderá financiar entre o 50 e o 70% das novas operacións de financiamento de circulante que as empresas precisen para manter a súa actividade económica e o seu cadro de persoal.

“Estamos confirmando que hai unha falta de liquidez e un estreitamento das cañerías financeiras como nunca”, argumentou Feijóo sinalando que por iso o Goberno galego está a facer o que normalmente fai de forma excepcional, e que agora xa se converteu en normal: que a Xunta avale o que antes avalaban as entidades financeiras. E por iso, destacou, “en dous anos de lexislatura se deu o 90% de todos os avais que se deron nos últimos 14 anos en Galicia”.

“Ante esta necesidade e ante o estrangulamento do crédito que supuxo a reforma financeira hoxe volvemos dar un paso máis”, engadiu Feijóo, explicando que unha vez presentado o programa que está a funcionar para as microempresas e para os autónomos, agora se presenta o programa ampliado ás pequenas e medianas empresas.

Unha iniciativa que, segundo explicou o titular da Xunta, financiará entre o 50 e o 70% de novas operacións de financiamento para circulante e que suporá un importe mínimo de 300.000 euros e un importe máximo de 3,5 millóns de euros. “Melloramos en 10 puntos as porcentaxes previstas na anterior convocatoria, de tal sorte que cubrirá o 50% das pólizas de crédito para circulante; ata o 60% das liñas de crédito para adianto de facturas; e ata o 70% nos casos de póliza de xestión de pagamentos a provedores”, asegurou Feijóo.

En canto ás novidades deste programa, o presidente galego expuxo que haberá unha nova liña para avalar ata o 50% das pólizas de responsabilidade, liquidación, e garantía de operacións mercantís, e que se poderá ampliar o prazo destes avais de 2 a 4 anos, o dobre, sempre que as empresas solicitantes acheguen garantías reais que non eran necesarias para os dous anos.

“Estamos, polo tanto, tentando solucionar o que o mercado financeiro solucionaba en épocas normais, e estamos tentando solucionar os problemas de liquidez que teñen as empresas para pagar as nóminas; o problema de liquidez que teñen as empresas para facer fronte ao pago de materias primas namentres non venden os produtos elaborados; e estamos facendo, en definitiva, o traballo que loxicamente debería facer as entidades financeiras se viviramos nun país san desde o punto de vista financeiro”, argumentou. Trátase, en definitiva, incidiu, “da maior liña de capital circulante nunca posto pola Xunta a disposición das empresas, para que poidan pagar gastos, para que poidan abonar nóminas e para que poidan seguir pagando as facturas”.

Na mesma liña, o presidente da Xunta referiuse ao balance da última convocatoria do programa de créditos, agora ampliada: máis de 50 millóns de euros (56) que beneficiaron a 120 empresas e que supuxeron a estabilidade de 6.500 postos de traballo.

Garantir a conservación da rede de estradas de Ourense
En materia de infraestruturas, o presidente galego informou de que a Xunta destinará 21 millóns de euros para a conservación integral da totalidade da rede autonómica de estradas da provincia de Ourense, garantindo “o mantemento e a mellora do cen por cento” das estradas competencia da comunidade autónoma nesta provincia para os próximos cinco anos.

“Blindamos fronte á crise económica o cen por cento da conservación e o mantemento durante os próximos cinco anos da totalidade da rede de estradas competencia da Xunta de Galicia”, preto de 2.000 quilómetros de estradas que benefician a 315.000 habitantes que viven nesa provincia, puntualizou.

O titular da Xunta explicou que esta medida “é unha forma de xestión distinta á de outras administracións públicas” e unha decisión “de enorme calado económico polos compromisos plurianuais que comporta”. Ademais, insistiu na importancia de conservar e velar polo mantemento de todas as estradas galegas antes de anticipar novas infraestruturas se despois non hai crédito para a conservación e o mantemento das xa existentes.