O conselleiro de Emprego, Comercio e Emigración, José González, acompañado polo secretario xeral da Emigración, Antonio Rodríguez Miranda, presentou hoxe en Santiago de Compostela os concertos que se celebrarán o vindeiro mes de outubro en Bos Aires no marco dunha nova edición de Saborea Galicia Calidade. A programación incluirá as actuacións de Baiuca, o día 10 en Groove, e de Luz Casal, o 12 no Palacio Libertad.

Con esta iniciativa, a Xunta de Galicia dá a coñecer parte dun programa máis amplo de actividades sobre Galicia en Bos Aires, que combinará música, gastronomía, catas e outras propostas culturais que se anunciarán nas próximas semanas. O obxectivo é ofrecer unha programación completa que amose a diversidade e a riqueza da comunidade con motivo da celebración da festividade nacional española, na que Galicia será rexión convidada de honra pola Embaixada de España. Asemade, unha vez máis, estas accións de promoción estenderanse tamén a Montevideo, no Uruguai.

O conselleiro agradeceu a participación dos artistas, subliñando a traxectoria de Luz Casal, á que definiu como referente e embaixadora universal galega, e o labor de Baiuca, que leva a tradición musical ás linguaxes máis vangardistas e conecta coas novas xeracións. González destacou que a presenza galega en Bos Aires constitúe unha oportunidade para fortalecer a proxección internacional e a visibilidade da Galicia actual nun dos escenarios máis significativos da diáspora. Neste sentido, sinalou que o programa permite reforzar os lazos culturais coa comunidade no exterior e, ao mesmo tempo, achegarse ao público xeral, colaborando cos nosos produtores na súa presenza internacional e difundindo a imaxe dunha Galicia orgullosa das súas raíces, á vez innovadora e capaz de competir a nivel global.

O titular de Emprego, Comercio e Emigración salientou tamén a dimensión simbólica desta programación como homenaxe ás galegas e galegos que cruzaron o océano levando consigo a esencia da nosa identidade, e puxo en valor o forte vencello emocional que seguen mantendo coa terra de orixe.

Saborea Galicia Calidade

Saborea Galicia Calidade é un evento pioneiro de promoción da gastronomía e dos nosos produtos no exterior, dirixido principalmente a profesionais e medios especializados. Este 2025 celebrarase en Bos Aires e Montevideo, aproveitando a visibilidade do Día Nacional de España para reforzar a presenza dos produtos galegos nos mercados arxentino e uruguaio.

O programa permitirá exhibir a autenticidade dos nosos produtos do mar e do agro, a distinción dos nosos viños e a creatividade dos cociñeiros galegos —certificados na súa maioría co selo Galicia Calidade— que reinterpretan a tradición cunha mirada contemporánea, abrindo novas oportunidades comerciais e consolidando a imaxe de Galicia como referente de excelencia e modernidade.