A Secretaría Xeral da Emigración, dependente da Consellería de Emprego, Comercio e Emigración, publicou hoxe a listaxe definitiva dos 250 mozos e mozas galegas do exterior que cursarán un mestrado nas universidades galegas de Vigo, Santiago de Compostela e A Coruña, grazas ás Bolsas de Excelencia Mocidade Exterior (BEME), que este ano acadan a súa décima edición.

Este programa ten como obxectivo promover o retorno da mocidade galega residente no exterior, facilitándolles a continuidade dos seus estudos de posgrao en Galicia e reforzando os vínculos coa súa terra. Dos 250 beneficiarios, a maior parte procede de América Latina, con Arxentina á cabeza cun total de 94 estudantes; seguida do Brasil con 37, Cuba con 31, Uruguai e Venezuela con 26, México con 9, entre outros países, como Bolivia, Chile, Colombia, Honduras, Panamá e República Dominicana.

Outros 16 estudantes proceden de Europa, de países como Alemaña, Bélxica, Francia, Irlanda, Italia, Países Baixos, Portugal e Reino Unido. E 1 estudante de Oceanía, especificamente de Nova Zelandia. En canto á distribución por universidades, 111 estudantes cursarán os seus estudos na Universidade de Vigo, 95 na Universidade de Santiago de Compostela e 43 na Universidade da Coruña.

As BEME.

As bolsas BEME teñen unha contía económica que varía entre 8.000 e 12.500 euros, dependendo da procedencia xeográfica das persoas beneficiarias e do número de créditos a realizar e destínanse a cubrir gastos como matrícula, viaxes, aloxamento e manutención durante o período académico en Galicia.

Enmárcanse na Estratexia Galicia Retorna, que conta con máis de 100 medidas destinadas a facilitar o regreso e a integración plena de persoas retornadas. Entre elas, as cinco oficinas físicas de atención ao retorno en Galicia, unha oficina móbil que percorre o rural galego, e o acompañamento previo ao regreso a través das delegacións no exterior e os centros galegos.

No 2025-2026 accederon a estas bolsas outros 250 mozos e mozas para estudar máis de 90 mestrados diferentes nas tres universidades públicas galegas. En total, desde 2017 e coa convocatoria do próximo curso, lévanse beneficiado das bolsas BEME máis de 2.000 mozos e mozas procedentes de máis de 40 países.

En relación aos resultados do programa, destaca que preto do 80% dos bolseiros -cunha idade media de 29 anos- deciden quedarse en Galicia, máis do 60% atopan emprego e o 90% recomenda a experiencia.