O secretario xeral da Emigración, Antonio Rodríguez Miranda, acompañou aos socios e socias do Club Galicia de Bonn e. V. na Festa da Primavera organizada esta fin de semana e na que se puido desfrutar da música e da cultura galegas.

A festa supón un traballo colectivo no que se dá a coñecer entre as e os membros da asociación, as súas familias e os seus veciños e veciñas desta localidade alemá, o baile, o canto e a música popular de Galicia. Recupérase así un dos eventos máis coñecidos entre a colectividade galega en Bonn que axuda a fortalecer os lazos entre as e os residentes nesta zona do país teutón.