Auspiciada pola Secretaría Xeral da Emigración, Isidoro A. Calvo Vidal pronunciou na Nosa Galiza de Xenebra a conferencia "Dereito de sucesións internacionais vs. Dereito de sucesións español e galego", durante a que disertou sobre as novidades introducidas coa entrada en vigor do Regulamento Nº 650/2012 da Unión Europea sobre o Dereito de sucesións, lexislación aplicable desde agosto de 2015 a aquelas que teñan carácter internacional ou transfronteirizo.

Con despacho na cidade da Coruña, o notario Calvo Vidal é, entre outros, membro do Colexio Notarial de Galicia e do Consello de Administración da Asociación da Rede Europea de Rexistros de Testamentos, conselleiro xeral da Unión Internacional do Notariado, delegado para asuntos europeos do Consello Xeral de Notariado, e conferenciante e autor de varias publicacións no eido das sucesións mortis causa.