As distintas asociacións culturais dos centros galegos do exterior que asistiron ao VI Día da Galicia Exterior continúan na comunidade para compartir a cultura e tradición galegas polas distintas vilas de Galicia. Deste xeito, onte, luns 11 de xullo, pola noite, os grupos do Lar Gallego de Chile e a Hermandad Gallega de Venezuela interpretaron varias pezas musicais e de baile tradicional na Praza Maior de Celanova, un municipio que conta cunha importante cifra de galegas e galegos no exterior, cun total de 4.328 persoas.

O VI Día da Galicia Exterior, festexado o pasado sábado 9 de xullo en Santiago de Compostela, foi unha xornada de confraternidade para celebrar o Ano Santo Xacobeo entre as 31 agrupacións culturais dos centros galegos do exterior participantes, reunindo a máis dun milleiro de galegas e galegos de todo o mundo.