O Concello da Coruña destinará 6.000 euros ao programa "Inserción laboral ao inmigrante", da ONGD Ecos do Sur. O obxectivo xeral deste servizo é facilitar o acceso ao emprego do colectivo inmigrante e emigrante retornado, así como a persoas en risco de exclusión social (mulleres vítimas de violencia de xénero, parados e paradas de longa duración, etc...) residente na cidade da Coruña.

De xeito máis específico, infórmase os usuarios e usuarias sobre cuestións básicas para a integración socio-laboral, valorando cada paso especificamente e orientándoo. Tamén se fomenta a busca autónoma de emprego, e que esta se apoie no uso das novas tecnoloxías. Outra das accións céntrase en realizar unha mediación entre as persoas demandantes de emprego e o tecido empresarial, establecendo canles de comunicación coa finalidade de conseguir a inserción laboral do colectivo, potenciando a súa participación real no mercado de traballo. As actividades concretas incluídas neste proxecto son orientación laboral xeral, busca activa de emprego e intermediación laboral coas persoas ou entidades empregadoras.

Fonte: Ecos do Sur | Foto: Ecos do Sur