Chega o outono e con el a castaña, o viño novo e a celebración dunha das festas propias desta época do ano, o Magosto. O Centro Cultural Galego de Frankfurt adiantou nesta ocasión á última fin de semana de outubro a celebración desta festa para poder participar nos Magostos que outros centros e asociacións de Alemaña celebrarán durante o mes de novembro coa achega do grupo Follas Novas da entidade.

Para esta ocasión o centro alugou un polideportivo en Kalbach, un pobo próximo á cidade financeira, coa intención de dar a coñecer ao público alemán esta tradicional festa galega. Foi unha aposta importante, innovadora e un tanto arriscada pois, aínda que se levou a cabo un gran labor publicitario, era imposible calcular o número de asistentes. Ás 19,00 h. empezaban a chegar as e os primeiros curiosos e unha hora máis tarde se estaban a engadir mesas e cadeiras para acomodar a un numeroso público dos cal, algunha que outra persoa, tivo que gozar da festa de pé tras esgotarse os asentos. Máis de 400 persoas, na súa gran maioría alemáns e alemás, gozaron e deixáronse enmeigar co Conxuro da queimada e as diversas especialidades galegas e españolas. No anecdótico, destacar o grande éxito da empanada galega, esgotada en sete minutos.

Na parte musical contouse coas actuacións, baixo intercambio cultural, de Arte Flamenca de la Pena Los Cabales, Pasión Flamenca de Niederrad e Dj Don Alfredo. O grupo anfitrión Follas Novas mostrou o seu novo repertorio de música e baile, aprendido e ensaiado ao longo das dúas semanas precedentes. A Xunta de Galicia facilitou, unha vez máis, as clases maxistrais de gaita a cargo de Anxo Lorenzo, quen acompañou aos rapaces e rapazas nos días anteriores e en calidade de profesor ao 35º Aniversario do S.C.R. Lar Galego de Rotterdam.

Son tempos difíciles para todas as sociedades e entidades galegas, pero a motivación e as ganas de seguir adiante deste grupo é tal que, ante a precariedade de profesorado ao seu alcance, decidiron tocar polas rúas para conseguir diñeiro e poder contratar un profesor de percusión durante unha semana, carrexando cos gastos de aloxamento e axudas deste e de Anxo Lorenzo durante a súa estanza na cidade alemá. Serxio Núñez foi a persoa que complementou e emendou as carencias deste renovado grupo en todos os aspectos, e as e os compoñentes de Follas Novas renunciaron ás dúas semanas de vacacións escolares para aproveitar ao máximo as clases maxistrais de ambos os dous profesores. Para a foliada das doce da noite contaron coa colaboraciónn de membros doutros grupos e amantes da gaitas galega doutros países, como Bélxica.

Así mesmo, o público alemán puido indagar nas ofertas turísticas de Galicia a través do material cedido pola Oficina Española de Turismo en Frankfurt. Sen dúbida, un grande éxito para a directiva organizadora do Centro Cultural Galego, que recibiu a felicitación, e a oferta de colaboración futura, das personalidades e institucións de Kalbach.