Como peche das actividades culturais que se desenvolveron ao longo deste ano nesta entidade galega da capital arxentina, a Sociedad Parroquial de Vedra en Bos Aires rematou cunha xornada dedicada ás e aos máis cativos, que compartiron xunto aos seus pais e nais e amizades, a historia do Apalpador. Participaron, tamén, outras institucións amigas que se achegaron ata a sede da rúa José Marmol da capital arxentina, como o Conjunto Pelayo de Manolo del Campo, do Centro Asturiano de Buenos Aires, e o Centro Arzuano Melidense.

Comezouse cunha actividade previa sobre vocabulario galego acompañando a temática, pasando ao relato da historia do Apalpador acompañada por imaxes do ilustrador Xoán G. Ao rematar, todas e todos os presentes bailaron ao ritmo do tema de Malvela O Apalpador , logo do cal, despois de facer silencio e pechar os ollos -cousa que non atraeu á personaxe-, comezaron a gritar nenas e nenos «Apalpador, Apalpador...», ata que acompañado das e dos músicos entrou ao Salón o tan esperado Apalpador, cheo de agasallos, froitos secos, doces e un souvenir que repartiu entre as nenas e nenos despois de palparlles a barriga. Todos e todas remataron debuxando a experiencia  con pinturas sobre papel e a despedir o ano.

Fonte e fotos: Sociedad Parroquial de Vedra en Bos Aires