O secretario xeral da Emigración, Antonio Rodríguez Miranda, desprazouse ata Andalucía esta fin de semana para asistir á presentación do libro Anduriña, La Voz de los gallegos en Sevilla, escrito por Marián Campra García de Viguera e editado polo Lar Gallego de Sevilla, prólogo da entrega das anduriñas aos socios destacados da asociación, que se celebrará mañá ao mediodía e que recoñecerá o labor de sete socios en prol da difusión da cultura e a tradicións galegas e o premio literario que organiza a entidade galegohispalense. 

“Non é frecuente atopar un traballo de investigación real, coa profundidade e rigorosidade que reclama esa palabra, aderezado coa pluma dunhas das persoas que mellor coñece e comparte a alma desta entidade galega para convertelo nun relato que dá gusto ler, que engancha, que esperta no lector a curiosidade de saber máis, de ver, de visitar un dos centros galegos máis activos de Andalucía. Porque este libro recolle a historia non só do Lar Galego e de Anduriña, se non da emigración galega no sur de España”, celebrou Miranda. “O traballo de recuperación da memoria levado a cabo polo Lar Gallego de Sevilla para inmortalizar os momentos que conformaron o cordón umbilical que une Galicia con Andalucía toma prestado o nome á súa maior testemuña, Anduriña, a revista que vén de cumprir seis décadas plasmando a realidade da emigración galega na comunidade andaluza”, engadiu o responsable do departamento autonómico.

O libro, baseado na tese doutoral realizada por Campra, explica que a publicación naceu “como unha revista chea de valores que recolle as vivencias dun pobo que ama a terra que lles viu nacer e que un día tiveron que deixar”.  “Dentro das paredes da súa casa, o Lar Gallego vive Galicia en Sevilla. As súas tradicións e festas populares vividas baixo o sol de Andalucía e recollidas despois nesta revista, que será o seu maior medio de comunicación, un medio a través do cal dará a coñecer xeración tras xeración a súa forma de vida, amando e vivindo a súa terra lonxe dela, confiando, como estas anduriñas, regresar pronto ao seu niño aínda que sexa durante a estación de verán”, sinala o volume. 

Anduriñas e relatos curtos
Mañá ao mediodía terá lugar o acto de entrega dos recoñecementos que cada ano outorga a entidade ás persoas e entidades que traballan en prol da difusión da cultura e tradicións galegas. O Lar Gallego de Sevilla entregará a Anduriña de Ouro ao médico Manuel Romero Gómez, especialista en aparato dixestivo e catedrático de Medicina na Universidad de Sevilla, e as Anduriñas de Prata a Juan Andones Muñoz, Joaquín Gómez Camacho, Manuel Pereiras Taboada, pedro Casanova Ales e Antonio Grande Viñuela polos seus 25 anos como socios do centro, así como un diploma a José Antonio Vallo Suárez, ligado a el desde hai catro décadas. A entidade outorgará, así mesmo, o primeiro premio do décimo Certamen de Relatos Cortos María Teresa Rodríguez a Juana Cortés Amunarriz pola obra titulada Besos de manzanilla. 

Máis de 60 anos de cultura
O Lar Gallego de Sevilla, fundado en 1956, é un dos máis activos de toda Andalucía e sede da Federación de Centros Gallegos da comunidade autónoma, segue a abrir as súas portas a todas as andaluzas e andaluces, tanto as e os vinculados con Galicia como aquelas e aqueles que están unidos a ela a través de lazos xenealóxicos. Con máis de 220 persoas asociadas e 62 anos de vida o centro galego de Sevilla busca invitar a todas e todos os andaluces a adentrarse nas tradicións e realidade galegas e a formar parte delas. Por iso, o responsable do departamento do Goberno galego felicitou á directiva, persoas asociadas e ao presidente da entidade, Raimundo Alfredo Otero, polo intenso labor cultural que están a organizar de cara os vindeiros meses. 

Andalucía é a sétima comunidade autónoma con maior presenza de cidadás e cidadáns galegos, cun total de 21.899, segundo os últimos datos oficiais publicados polo Instituto Nacional de Estadística (INE) con data 1 de xaneiro de 2018. Delas e eles, 9.552 son orixinarios da provincia da Coruña, 2.255 da de Lugo, 2.970 da de Ourense e 7.122 da de Pontevedra.