O secretario xeral da Emigración, Antonio Rodríguez Miranda, deu a benvida este venres en Pontecesures a un grupo de 42 peregrinos da Irmandade Galega de Rubí que están a realizar o Camiño Portugués pola súa Variante Espiritual.

Os participantes, que iniciaron a ruta o pasado 29 de setembro, chegaron hoxe en barco desde Vilanova de Arousa a Pontecesures, punto de partida da súa última etapa antes de acadar a Catedral de Santiago este sábado.

Miranda destacou a importancia deste tipo de iniciativas que “permiten reforzar os vencellos coa terra a través dunha experiencia única de espiritualidade, cultura e convivencia, e que ao mesmo tempo proxectan no exterior a forza e vitalidade do Camiño de Santiago”.

O secretario xeral tamén puxo en valor o papel da Irmandade Galega de Rubí “como exemplo do labor que as entidades galegas realizan en Cataluña, para manter vivas as nosas tradicións e fortalecer a identidade galega alí onde hai galegos”.