O secretario xeral da Emigración, Antonio Rodríguez Miranda, mantivo unha reunión co presidente de Fagama (Federación de Asociación Galegas en Madrid), Horacio Rico, co obxectivo de coordinar as actividades que está a preparar a entidade para os próximos meses de cara a continuar a promocionar a galeguidade na capital de España.

Durante a reunión, o responsable do departamento autonómico confirmou o interese da Secretaría Xeral en colaborar nestas iniciativas de apoio á cultura galega e que se desenvolverán antes de fin de ano. A maiores, Rodríguez Miranda interesouse tamén pola situación das entidades que conforman a asociación e pola situación dos galegos e galegas na comunidade autónoma madrileña.