O secretario xeral da Emigración, Antonio Rodríguez Miranda, asistiu hoxe á celebración “Galicia en Madrid” no teatro Lara, organizada pola Federación de Asociacións Galegas nesta comunidade (FAGAMA) e que contou coa actuación central do grupo Ramalleira, liderado polo recoñecido gaiteiro Miguel Ramalleira. Na gala tamén actuaron un grupo de cantareiras xunto a Agrupación Artística Gallega Rosalía de Castro e varios artistas afincados en Madrid como Arcadio Falcón. Contou coa participación do humorista galego Sergio Pazos e o director Rubén Riós. O obxectivo deste evento, que contou coa colaboración da Xunta de Galicia, é continuar a promocionar a cultura galega na capital de España.

No acto, o secretario xeral da Emigración estivo acompañado do presidente de FAGAMA, Horacio Rico. Tamen asistiron o presidente de AEGAMA, Julio Lage; a presidenta do Club de Periodistas Gallegos en Madrid, Pilar Falcón; Carlos de Blas, da Orden da Vieira, e o presidente do Centro Gallego de Madrid. Miranda dirixiuse ás e aos asistentes felicitando as festas do Nadal e agradecendo a FAGAMA o labor que desenvolve en Madrid en prol da cultura e a lingua galegas, destacando os eventos e actividades que xa se están a preparar de cara ao próximo ano, continuando así cun labor esencial “para que Galicia continúe tendo presenza na capital do Estado e os madrigalegos sigan a sentir a cercanía dunha terra que segue a contar con eles”.