O secretario xeral da Emigración, Antonio Rodríguez Miranda, acompañado pola delegada da Xunta en Uruguai, Elvira Domínguez e o cónsul xeral de España en Uruguai, Juan Carlos Gafo, participou na tradicional romaría organizada polo Centro Galego de Montevideo, unha celebración que reuniu a milleiros de persoas da colectividade galega e que volveu converterse nun dos grandes encontros anuais da galeguidade no país. Durante a xornada, Miranda puxo en valor o papel das entidades galegas do exterior como espazos de encontro e transmisión da cultura e das tradicións, destacando o compromiso da colectividade galega en Uruguai por manter viva a súa identidade e fortalecer os vínculos con Galicia.

A romaría congregou ao longo de todo o día a numerosos asistentes que se achegaron ao Centro Galego para gozar da gastronomía tradicional e das actuacións dos grupos de canto e baile da colectividade, nun ambiente festivo que puxo de manifesto a vitalidade da cultura galega no país. Este tipo de encontros evidencian o forte arraigo da comunidade galega en Uruguai e o labor constante das entidades por preservar e difundir o patrimonio cultural e social de Galicia entre as novas xeracións, unha tarefa que a Xunta continúa apoiando e acompañando