A delegada da Xunta de Galicia en Uruguai, Elvira Domínguez, participou no acto de entrega do Premio Colón 2025 outorgado pola Federación de Institucións Españolas do Uruguai á Liga Española de Deportes, en recoñecemento ao seu labor histórico na promoción do deporte e da integración da colectividade española. Domínguez felicitou aos seus responsables por manter viva unha entidade que simboliza a fraternidade e o compromiso das comunidades españolas no país.

Durante o evento, celebrado en Montevideo, a representante da Xunta puxo en valor a contribución das institucións españolas —e en especial das galegas— á vida social e cultural do Uruguai, subliñando que “a colectividade é unha ponte viva entre Galicia e América, que segue a proxectar os valores de solidariedade, esforzo e identidade compartida”.

Por outro lado, a delegada participou na Feira das Colectividades de Uruguai. Un espazo que permitiu achegar ao público uruguaio a riqueza cultural galega e fortalecer o sentimento de pertenza entre a colectividade residente no país.