O secretario xeral da Emigración, Antonio Rodríguez Miranda, está a aproveitar a Semana Santa para manter unha rolda de encontros telemáticos cos galegos e as galegas do exterior. O obxectivo destas reunións, que se levarán a cabo a través de videoconferencias, é permitir un seguimento constante e personalizado da situación da colectividade galega en todo o mundo a través dos centros, aos que reiterou a preocupación do Goberno galego pola evolución da súa situación por mor da crise do coronavirus.

Unha xuntanza do titular do departamento autonómico co da Delegación da Xunta na Arxentina e O Uruguai, Alejandro López Dobarro, abriu o ciclo que complementa o contacto permanente que se mantén desde a Secretaría coas galegas e os galegos do exterior, e que continuará con representantes doutras entidades de Europa e América. Durante o encontro, os responsables de ambas institucións repasaron a actualidade do país e da colectividade galega que vive neles, e estudaron posibles medidas de reforzo para paliar as consecuencias que a pandemia da COVID-19 pode ter nas cidadás e os cidadáns galegos de ámbolos dous países andinos.

Na Arxentina, o país con maior presenza galega do mundo, residen actualmente máis de 180.000 galegas e galegos, entre os nados na comunidade e os descendentes que xa foron nados na súa terra de acollida. O Uruguai, pola súa banda, ocupa o cuarto lugar dos países con maior cantidade de poboación galega, con máis de 41.000 habitantes orixinarias e orixinarios de Galicia, só precedido polo Brasil e Cuba.

Agrupados por territorio
A elevada cantidade de centros galegos que hai no exterior permite, así, agrupalos por continentes, países ou mesmo comunidades autónomas, no caso de España, para a celebración das videoconferencias. Nos vindeiros días, Antonio Rodríguez Miranda trasladará os encontros telemáticos a España e outros países de Europa nos que se sitúan entidades galegas.