Arxentina celebrou o seu particular Congreso de Gaiteiros. A Escola de Gaitas do Centro Gallego de Mar del Plata, dirixida por José Manuel Montes, exerceu de anfitriona na III Xuntanza Nacional na que participaron gaiteiros e gaiteiras de distintos centros da cidade de Bos Aires.

Varios centos de persoas acudiron ao salón de actos do Centro Gallego para gozar do encontro no que o son das gaitas foi o protagonista. O mestre Santiago Molina, estudoso da percusión tradicional galega, foi o encargado de dirixir o acto. Tamén participou o profesor Abraham Fernández López, posuidor dun extenso currículo vitae sobre música tradicional galega.

O acto clausurouse cunha entrega de diplomas e obsequios ás e aos asistentes por parte da directiva do centro e unha cea cunha queimada como broche final.

Fotos: Facebook A.B.C. Partido de Corcubión