Galegas e galegos do Uruguai percorreron esta pasada fin de semana os dez quilómetros que separan as dúas mouteiras da ruta xacobea que existen en Montevideo e que conectan a empresa Cutcsa coa praza de Galicia na Rambla.

O obxectivo desta iniciativa, posta en marcha pola Asociación Uruguaya de Amigos del Camino de Santiago, foi promover o Camiño de Santiago e o Ano Santo Xacobeo que estamos a vivir. Esta entidade leva tempo traballando para potenciar o Camiño en Uruguai, e xa creou unha ruta de 25 quilómetros que une 35 puntos que vinculan a Galicia con Uruguai. A idea é, posteriormente, enlazar este camiño co departamento de Colonia.