Os centros galegos situados nas distintas comunidades autónomas de España desenvolveron ao longo do mes de maio diversos actos para enxalzar a figura do ensaísta e editor Francisco Fernández del Riego , a quen se dedicou este ano o Día das Letras Galegas. As entidades desenvolveron diferentes coloquios, concertos, conferencias, exposicións e charlas relativas á figura do homenaxeado este ano. Deste xeito, o Centro Gallego de Santander ofreceu unha sesión monográfica sobre a figura de Fernández del Riego, na que tamén se proxectaron diversos vídeos. O mesmo tivo lugar no Centro Gallego de Salamanca, na Asociación Galega Corredor do Henares, a Casa de Galicia en Las Palmas, o Centro Gallego de Ceuta, o Aturuxo de Castelló, o Centro Gallego de Madrid, o Lar Gallego de Pamplona, a Irmandade Galega de Rubí e o Centro Galego de Vitoria. 

Con concertos e corais o festexaron na Xuntanza de Galegos en Alcobendas, no Lar Gallego de Avilés ou o Centro Galego de La Rioja. A Casa de Galicia de Valladolid ofreceu unha velada musical con foliada, o Centro Gallego de Málaga unha degustación de produtos galegos, o Centro Gallego de Móstoles organizou un obradoiro para nenas e nenos para aprender a redactar artigos, mentres o Centro Galego de Barcelona puxo en marcha un certame de cartas de amor e desamor. Houbo visualizacións audiovisuais no Centro Gallego de Santa Cruz de Tenerife e xornadas literarias no Lar Gallego de Sevilla, no Centro Gallego de Zaragoza e no Centro Gallego de Alicante. Finalmente, o Centro Gallego Noroeste de Madrid centrou as actividades no teatro mentres a Casa de Galicia en Córdoba fallou o seu tradicional premio Rosalía de Castro, que este ano recaeu no artista cordobés José María Higuera González, co seu libro Desechos.