A Secretaría Xeral da Emigración recuperou en 2021 as actividades de lecer para os galegos e galegas do exterior en colaboración con máis de 50 centros, tanto de España como de Europa, desenvolvendo proxectos de achegamento a Galicia como foron os Conecta e Reencontros co Xacobeo, desenvolvidos en outubro e novembro.  

Tanto o programa de Conecta, destinado a menores de 65, como o de Reencontros, no que participaron maiores desa idade, tiveron como obxectivo promover os lazos con Galicia e coa súa cultura a través do Camiño de Santiago das persoas vinculadas ás entidades galegas que existen tanto no resto de comunidades autónomas de España como nos países europeos, fomentando a súa participación no Ano Santo. 

A Secretaría Xeral quixo así dar un pulo ás entidades e centros galegos, así como aos seus asociados e asociadas, que sufriron numerosos peches e limitacións a causa da pandemia durante o peor ano da covid-19, e que son promotores do Camiño de Santiago en todos os lugares onde teñen a súa sede.

As e os participantes, procedentes de máis de 50 entidades distintas, percorreron, no caso do Conecta, 100 quilómetros do Camiño Portugués e da Vía da Prata ao longo dunha semana ata chegar a Compostela, mentres as e os segundos, realizaron varios pequenos tramos deste último Camiño, descubrindo o patrimonio cultural e natural das respectivas zonas polas que foron pasando así como tamén realizaron actividades de balneario no lugar de aloxamento.