Emigración e Consumo achegan aos e ás inmigrantes formación para solventar os seus conflitos de consumo
Os cursos tratan de abordar aspectos prácticos, como o aforro na tarifa eléctrica, os teléfonos de tarificación adicional, ou os procedementos para formular unha reclamación.
Pediuse aos formadores e formadoras que sirvan de intermediarios coas persoas extracomunitarias coa fin de desenvolver accións que respondan ás necesidades reais desta poboación.
O Programa Brandán, que están a desenvolver por segundo ano consecutivo a Secretaría Xeral da Emigración e o Instituto Galego de Consumo conxuntamente, é unha ferramenta deseñada para dar a coñecer os dereitos e deberes dos consumidores entre as persoas inmigrantes dun xeito práctico, claro e sinxelo.
A última das accións desenvolvidas ao abeiro este programa realizouse en Santiago, na sede da Escola Galega de Consumo, onde tivo lugar unha xornada de formación de formadores e formadoras en dous aspectos prácticos que supoñen en non poucas ocasións un importante atranco para a poboación en xeral, e en especial para aquela á que vai dirixida esta acción. Estes dous asuntos son a tarificación eléctrica, e os números telefónicos con cobros adicionais.
Nesta ocasión, na medida en que esta acción estaba encamiñada basicamente a mellorar a formación dos formadores e formadoras, e sabendo que esta figura é fundamental para espallar os coñecementos na materia, pediuse ás persoas participantes que trasladen -tanto ao Instituto Galego de Consumo como á Secretaría Xeral da Emigración- as preguntas máis frecuentes en materia de consumo entre os estranxeiros e estranxeiras nados en países de fóra da Unión, para facer fronte á súas necesidades reais e cotiás.
Obxectivos do programa
O programa Brandán vai dirixido ás persoas inmigrantes e, en especial, aos e ás residentes de procedencia extracomunitaria, podendo tamén participar as persoas retornadas e aqueles profesionais que traballan no eido das migracións. Os obxectivos xerais do programa son favorecer o proceso de integración a través do coñecemento dos dereitos e deberes como persoas consumidoras, así como proporcionar información para o posible aforro en situacións concretas. Para facilitarlles o exercicio dos dereitos como consumidores, ofrécese información sobre os organismos de protección existentes, os procedementos de reclamación e denuncia, e as vías de resolución de conflitos de consumo.
A denominación do programa responde a lenda de ‘Brandán O Navegante’, famoso polas súas viaxes na época medieval, quen aprendía os costumes das novas cidades ás que chegaba. Dispor da axeitada información da sociedade de acollida, sobre todo nos primeiros momentos, é básico para poder exercer os propios dereitos de forma efectiva e nunha situación de igualdade.
Para obter máis información sobre as xornadas pode consultarse a páxina da rede www.galiciaaberta.com, da Secretaría Xeral da Emigración, desde onde se poden realizar as inscricións pertinentes por medios telemáticos, a través do Plan de Formación.
Novas relacionadas