Emigración duplica os recursos da Oficina Integral de Asesoramento e Seguimento ao Retorno en Vigo con máis técnicos laborais

O secretario xeral da Emigración, Antonio Rodríguez Miranda, visitou hoxe a sede situada na cidade olívica onde destacou a aposta da Xunta polo retorno coa ampliación das e dos técnicos destinados a apoiar aos galegos e galegas do exterior nos eidos laboral, social e xurídico na súa volta a Galicia, que contará, ademais, como no resto de Galicia dende agora con asesoramento tributario e fiscal básico.

Recordou que a Administración autonómica conta con cinco sedes situadas en Santiago de Compostela, A Coruña, Lugo, Ourense e Vigo. 

A nivel galego, superáronse as 60.000 consultas, tanto presenciais como telefónicas e telemáticas dende a súa posta en marcha en 2020 das que na oficina de Vigo se atenderon por encima das 12.000.

  • Antonio Rodríguez Miranda, esta mañá, durante a visita á Oficina do Retorno de Vigo
    Antonio Rodríguez Miranda, esta mañá, durante a visita á Oficina do Retorno de Vigo
  • Antonio Rodríguez Miranda, esta mañá, durante a visita á Oficina do Retorno de Vigo
    Antonio Rodríguez Miranda, esta mañá, durante a visita á Oficina do Retorno de Vigo
Listen to this page using ReadSpeaker
Vigo, 24 de agosto de 2023.

O secretario xeral da Emigración, Antonio Rodríguez Miranda, visitou esta mañá, acompañado do secretario territorial da Delegación da Xunta en Vigo, Fernando Abeijón, a sede da Oficina Integral de Asesoramento e Seguimento ao Retorno situada no edificio administrativo da Xunta, onde xa foron atendidas, dende a apertura deste servizo, en 2020, máis de 12.300 consultas. En toda Galicia superáronse as 60.000 consultas presenciais, telefónicas e telemáticas.

O responsable de Emigración destacou a aposta da Xunta de Galicia polo retorno, coa ampliación das e dos técnicos destinados a apoiar aos galegos e galegas do exterior nos eidos laboral, social, xurídico, e agora, en particular, fiscal e tributario na súa volta á comunidade autónoma, e recordou que existe unha delegación desta oficina en Lugo, A Coruña, Ourense, Vigo e Santiago de Compostela

Durante esta visita, o responsable do departamento autonómico destacou que, ademais, tamén se potencia a Oficina Integral ao Retorno cun novo servizo fiscal e tributario básico.  

Miranda destacou o labor destas Oficinas Integrais de Asesoramento e Seguimento ao Retorno no acompañamento e axuda aos galegos e galegas do exterior que decidiron retornar a Galicia e comezar unha nova vida.  “Trátase do punto de referencia esencial de todo o traballo da Estratexia Galicia Retorna que acabamos de ampliar cun segundo período ata 2026. Deste xeito, non só potenciamos os servizos, ampliando os programas de apoio ao retorno, senón tamén agora os servizos que, como a Oficina Integral ao Retorno, permiten garantir un regreso máis sinxelo e axeitado dos galegos que apostan pola nosa sociedade para o seu futuro”, engadiu o secretario xeral. 
 
Estas oficinas están cofinanciadas polo Fondo Social Europeo e contan con persoal técnico, xurídico e social especializado que se encarga de informar e asesorar aos galegos e galegas do exterior de cara a favorecer o retorno, así como de acompañar ás e aos galegos retornados e aos seus e as súas familiares. Entre os seus labores atópase atender as dúbidas en relación ás diferentes tramitacións burocráticas que se deben realizar ao regresar a Galicia, así como dar traslado tamén dos programas e axudas cos que poden contar nesta volta á comunidade autónoma. Tamén comunican os temas relacionados con educación, formación, laboral e social e, mesmo no caso das e dos familiares con outra nacionalidade, tamén asesoran de xeito básico no eido da estranxeiría, ofrecendo apoio continuo, tanto presencial coma telemático.

Dende o comezo do seu funcionamento, como parte da Estratexia Galicia Retorna, as cinco oficinas integrais das catro provincias asesoraron a máis de 15.000 familias interesadas en coñecer as liñas de apoio coas que a Xunta de Galicia conta para axudarlles a consolidar o seu regreso, así como as canles existentes para homologar estudos, facilitar a tramitación da documentación persoal e a presentación de solicitudes de subvencións e prestacións. 

Así, en total, atendéronse ata o momento, dende a posta en marcha da oficina en 2020, máis de 60.000 consultas, relacionadas con temas educativos (escolarización de menores, formación regrada, formación para o emprego, homologación de estudos...); sociais como asistencia sanitaria, autorizacións de residencia, axudas económicas, prestacións ou vivenda; ou laborais como información acerca do emprego por conta allea ou axudas ao autoemprego.  

  • Audio: Declaracións do secretario xeral da Emigración | Descargar
367 lecturas