A Oficina integral de asesoramento e seguimento ao retorno en Lugo atendeu case 2.000 consultas para facilitar a integración das e dos galegos retornados na provincia

O secretario xeral da Emigración, Antonio Rodríguez Miranda, e o delegado da Xunta en Lugo, Javier Arias, visitaron a oficina situada no edificio administrativo da cidade da muralla, que conta con persoal especializado para acompañar persoalmente aos galegos e galegas de exterior en todo o seu proceso de retorno.

Dende a súa creación, as cinco oficinas integrais do Retorno de Galicia atenderon preto de 30.000 consultas de todo tipo, dende económicas ata escolarización de menores, emprego ou autorización de residencia.

O secretario xeral da Emigración e o delegado da Xunta en Lugo, esta mañá na Oficina do Retorno da capital lucense
O secretario xeral da Emigración e o delegado da Xunta en Lugo, esta mañá na Oficina do Retorno da capital lucense
Listen to this page using ReadSpeaker
Lugo, 10 de febreiro de 2022.

O secretario xeral da Emigración, Antonio Rodríguez Miranda, e o delegado territorial en Lugo, Javier Arias, visitaron esta mañá a Oficina integral de asesoramento e seguimento ao retorno desta localidade, situada no edificio administrativo da Xunta na cidade da muralla, comprobando o labor realizado ao longo destes meses para acompañar e axudar ás galegas e galegos do exterior que decidiron retornar a Galicia e comezar unha nova vida.  

Esta oficina, xunto as situadas en Ourense, Vigo, A Coruña e Santiago de Compostela, están cofinanciadas polo Fondo Social Europeo e contan con persoal especializado que se encarga de informar e asesorar ás e aos galegos do exterior cara a favorecer o retorno, así como de acompañar ás cidadás e cidadáns galegos retornados e ás e aos seus familiares. Tamén explican tódolos programas da Secretaría Xeral da Emigración dirixidos á diáspora, así como asesoran sobre os temas relacionados con educación, formación, laboral e social, e mesmo, no caso das e dos familiares con outra nacionalidade, tamén orientan no eido da estranxeiría, ofrecendo apoio continuo, tanto presencial como telemático.

Dende a súa posta en marcha, en febreiro de 2020, as oficinas integrais das catro provincias asesoraron a un total de 8.153 persoas, acompañándoas na súa integración en Galicia e informándolles sobre as liñas de apoio coas que a Xunta de Galicia conta para axudarlles a consolidar o seu regreso, así como os canais existentes para homologar estudos, facilitar a tramitación da documentación persoal e a presentación de solicitudes de subvencións e prestacións. 

Así, en total, realizáronse 29.292 consultas, das que 3.213 estaban relacionadas con temas educativos (escolarización de menores, formación regrada, formación para o emprego, homologación de estudos...); 13.519 tiveron que ver con temas sociais como asistencia sanitaria, autorizacións de residencia, axudas económicas, prestacións ou vivenda; 6.630 tiñan que ver con temas laborais como información acerca do emprego por conta allea ou axudas ao autoemprego e, finalmente, 3.831 cuestións tiñan relación con outros trámites. 

A oficina situada en Lugo, que atende a toda a provincia, respondeu cuestións tanto presenciais como telefónicas de 466 persoas, e resolveu un total de 1.876 consultas das que 330 foron cuestións educativas, 1.335 sociais e 380 laborais.

A posta en marcha destas oficinas formou parte da anterior Estratexia Galicia Retorna do Goberno galego, que contou cun orzamento global de preto de 500 millóns. Nestes intres, tal e como destacou Rodríguez Miranda, “estamos xa a traballar na nova Estratexia que se porá en marcha este mesmo ano e que permitirá continuar a acompañar persoalmente aos galegos do exterior en todo o proceso de retorno”. 

  • Audio: Antonio Rodríguez Miranda, secretario xeral da Emigración | Descargar

287 lecturas