Emigración destina 575.000 ás axudas destinadas a obras e adquisición de equipamentos para as entidades galegas do exterior

O secretario xeral de Emigración, Antonio Rodríguez Miranda, destaca que este ano mantense a convocatoria para a adquisición de aplicacións informáticas de xestión que permitan facilitar a comunicación co Rexistro de Comunidades Galegas e a solicitude e xustificación de axudas á administración. 

O prazo de presentación de solicitudes será dun mes, ata o próximo 28 de febreiro
O prazo de presentación de solicitudes será dun mes, ata o próximo 28 de febreiro
Listen to this page using ReadSpeaker
Santiago de Compostela, 28 de xaneiro de 2022.

O Diario Oficial de Galicia publica hoxe a nova liña de axudas para as entidades galegas do exterior, que contará cun crédito orzamentario de 575.000 euros e que se destinará á conservación do patrimonio, mellora de equipamentos e reforma das instalacións.

Novamente este ano poderanse acoller a esta liña de axudas todas as entidades, sen diferencia pola súa tipoloxía: as comunidades galegas, centros colaboradores da galeguidade, centros de estudo e cultura galega.

Tamén se mantén nesta convocatoria a inclusión dunha liña de axudas para que as entidades poidan adquirir aplicacións informáticas de xestión para a súa dixitalización, facilitando así por unha banda, a relación coa administración en relación a presentación e xustificación de subvencións, así como co Rexistro de Comunidades Galegas, o que permitirá que teñan actualizada toda a súa documentación. 

O prazo de presentación de solicitudes será dun mes, ata o próximo 28 de febreiro, e as entidades poderán solicitar ata o 80% do investimento total. En concreto, os demandantes poderán solicitar axudas para obras, reforma de instalacións, conservación do patrimonio cultural e mellora de dotacións e equipamentos de carácter inventariable.

O secretario xeral da Emigración, Rodríguez Miranda, destacou que “continuamos a traballar en colaboración coas nosas entidades para que, nestes tempos tan complexos, poidan contar cos recursos suficientes para garantir non só o seu funcionamento senón tamén para contar cunhas instalacións axeitadas que permitan dar a mellor atención aos nosos galegos do exterior”.

Os centros interesados poden tamén informarse a través desta ligazón.
 

474 lecturas