O secretario xeral da Emigración, Antonio Rodríguez Miranda, asistiu á inauguración da exposición que sobre a figura de Antonio Palacios pon en marcha a Casa de Galicia en Madrid da man da artista e sobriña-bisneta do arquitecto galego, Amelia Palacios.

O responsable de Emigración estivo acompañado de numerosas e numerosos responsables de centros galegos en Madrid, agradecendo especialmente a FAGAMA, a Federación de Asociaciones Gallegas en Madrid, a posta en marcha desta iniciativa, "que permite pór en valor a un dos artistas e profesionais galegos máis relevantes da nosa recente historia".

Destacou a importancia desta mostra coa que se inician aos actos de homenaxe ao arquitecto do Porriño polo 150º aniversario do seu nacemento, destacando a importancia que Palacios tivo para enriquecer a arquitectura galega, “xa que axudou a afianzar a súa identidade, especialmente en Madrid, onde realizou diversos edificios de relevancia internacional”. 

A exposición, composta por diferentes cadros e debuxos que recrean os perfís dos principais edificios realizados por Antonio Palacios na capital española, poderase visitar na Casa de Galicia de Madrid entre o 5 e o 29 de setembro.