Os case 30 mozos e mozas galegas do exterior que chegaron a pasada semana para participar no programa Conecta con Galicia da Secretaría Xeral da Emigración están a rematar a súa estadía na nosa comunidade autónoma coñecendo a realidade empresarial galega e os espazos naturais máis destacados. Así, hoxe achegáronse ata a sede de Anfaco en Vigo e mañá xoves será o momento de coñecer os avances tecnolóxicos que ofrece o Parque Tecnolóxico de Rozas en Castro de Rei.

Ao longo destas xornadas, este pasado luns tamén visitaron a Fundación Aquis Querquennis en Ourense, o mosteiro de Oseira e o Museo Etnográfico Olimpio Liste; o martes fixeron unha etapa do Camiño de Santiago aproveitando a celebración do 25 de xullo; e hoxe, ademais do Museo da Conserva de Anfaco en Vigo, achegáronse ata a praia de Rodas e o faro das Illas Cíes, rematando mañá a visita a espazos naturais galegos na Ribeira Sacra. 

Este programa, realizado en colaboración coa Dirección Xeral de Xuventude, Participación e Voluntariado ao longo de dúas quendas e que se desenvolve no albergue de Gandarío, permite que persoas nadas en Galicia ou descendentes de emigrantes galegas e galegos de 16 e 17 anos volvan ter contacto coa realidade galega e o encontro coas e cos seus familiares, supoñendo para moitas e moitos deles a primeira posibilidade de coñecer fisicamente a terra das e dos seus devanceiros, e as xeracións da familia que quedaron na Galicia territorial.