A delegada da Xunta de Galicia en Uruguai, Elvira Domínguez, participou no acto de entrega por parte da Federación de Asociacións Galegas do Uruguai (FAG) do Premio Castelao 2025 a Martín Rodríguez Caridad, un coruñés radicado en Montevideo desde a súa infancia que dedicou máis de seis décadas á promoción da cultura galega. Elvira Domínguez destacou os valores que representa o homenaxeado: “tradición, familia, rica historia cultural, hospitalidade e comunidade forte e unida”, facendo fincapé na súa humildade, capacidade de inspiración e espírito colaborativo, que o converten nun referente respectado por todos.

Durante o acto celebrado no Centro Galego, o galardoado foi eloxiado por Mónica Calviño, presidenta da FAG, quen salientou o seu papel como “referente próximo” e eloxiou o seu labor ao impulsar iniciativas como as Olimpíadas de xogos de salón da Liga Española de Deportes, das que foi alma máter, contribuíndo ao fortalecemento da comunidade galega e española en Uruguai.