O secretario xeral da Emigración, Antonio Rodríguez Miranda, salientou a importancia das Oficinas do Retorno para axudar a todas as galegas e galegos do exterior que se atopan no proceso de volver a residir en Galicia. Neste sentido, apuntou que xa son 37.000 as solicitudes atendidas desde a súa posta en marcha a principios de 2020.

Así o destacou esta mañá en Sarria, a onde se achegou para visitar a Oficina Móbil do Retorno situada hoxe no municipio. Resaltou a importancia desta iniciativa itinerante, que completa o labor das oficinas físicas, e que comezou en novembro de 2023 como unha das novas accións da Estratexia Galicia Retorna 2023-2026. En total leva atendidas xa máis de 750 familias nas 372 visitas realizadas a 232 concellos diferentes de Galicia.

Na provincia de Lugo, a Oficina do Retorno atendeu xa a máis de 4.000 persoas, mentres que, desde 2024, a Oficina Móbil realizou 82 visitas a 49 concellos do territorio lucense.

O secretario xeral da Emigración visitou hoxe tamén o Polo de emprendemento e apoio ao emprego de Sarria, un dos 15 situados en toda Galicia e que leva atendido máis de 150 proxectos en total. Alí puxo en valor o papel desta rede impulsada pola Xunta como mecanismo de axuda para poder orientar ás persoas emprendedoras a consolidar os seus propios negocios, incluídas tamén as galegas e galegos retornados que aposten por un proxecto por conta propia.