O secretario xeral da Emigración, Antonio Rodríguez Miranda, participou este domingo nun evento de carácter nacional en Suíza, que contou coa presenza de 54 nacións e cantóns de todo o país, así como a participación de nacións veciñas como Austria, Francia e Italia. Este evento, que se estendeu ao longo de tres días, tivo o seu acto principal cun desfile polas rúas de Zürich, transmitido en directo pola televisión suíza.

A Asociación Cultural “As Xeitosiñas”, Grupo de Baile e Banda de Gaitas, representou a Galicia neste importante evento. Con traxes de gala tradicionais, “As Xeitosiñas” desfilaron no posto número 31.

Despois do desfile, a Asociación Cultural “As Xeitosiñas” desprazouse á estación para ofrecer unha actuación musical, levando así un anaco da cultura galega ás e aos espectadores e asistentes ao evento.

Esta participación representou unha oportunidade única para mostrar a riqueza cultural de Galicia e fortalecer os lazos coa diáspora galega en Suíza, así como coas demais nacións presentes.