“Os galegos somos un pobo cunha faciana pétrea, cheo de sentimento pero ao mesmo tempo dotado dunha fortaleza insuperable”, con estas palabras referiuse o presidente da Xunta, Alberto Núñez Feijóo, durante a inauguración onte da mostra Gallaecia Pétrea, ao vencello que existe entre a pedra e Galicia e as galegas e os galegos. “Sen ela, dificilmente podería entenderse esa teima por perpetuarnos malia todas as dificultades. Non pode resultar estraño que a pedra estea presente na nosa conciencia colectiva para simbolizar a forza e a continuidade, xa que vemos nela un elemento capaz de vencer aos elementos máis adversos”, aseverou.

Feijóo subliñou que, entre os petróglifos e as esculturas de Asorey; entre os dolmens e unha obra de Francisco Leiro, Silverio Rivas ou Manolo Paz; entre o faro de Hércules e a muralla de Lugo; entre a Catedral de Santiago e a Ponte Romana de Ourense; entre a Basílica de Santa María e o Castro de Vigo; entre o Castelo de San Felipe e calquera ermida de calquera das nosas parroquias, hai un vencello indiscutible, “xa que son etapas da continuidade do país que naceu xeoloxicamente hai 350 millóns de anos en Campodola; trátase de respostas en pedras a diferentes momentos da nosa presenza no mundo. Galicia é a mesma grazas a que se transforma”.

Deste xeito, o titular da Xunta afirmou que a pedra envía unha mensaxe que queda ben patente nesta mostra: “Estamos de novo nun mundo convulso, con incertezas non moi diferentes das que tiveron que afrontar os galegos doutros tempos. Coma eles, precisamos de dúas ferramentas para superalas: fidelidade ao noso e capacidade de innovación. A pedra adopta distintas formas, para ser refuxio, defensa ou ornamento. O noso país require tamén de decisión para coller o testemuño dos antergos, preservalo, axeitalo e transmitilo”.

Logo de salientar que a mostra Gallaecia Petrea cóntanos unha historia de Galicia mediante a pedra, asegurou que esa historia abre hoxe un capítulo novo coa apertura do Museo da Cidade da Cultura. “Estamos reafirmando aquí que Galicia non se detén. Sabemos acompasar o paso dos nosos desexos ás difíciles circunstancias que nos rodean. Tan erróneo é deixar que un anhelo de grandiosidade nos faga esquecer a necesaria austeridade, como afogar iniciativas que nos proxectan no presente e no futuro”, dixo.

Feijóo referiuse ás palabras pronunciadas pola Súa Alteza Real o Príncipe de Asturias, pronunciadas na inauguración oficial do complexo, a Cidade da Cultura de Galicia é algo "sereno, estimulante e renovador", para asegurar que serenidade, estímulo e renovación seguirán guiando ao Goberno galego para darlle contido, “e que sexa un espazo de apoio á difusión da obra dos creadores galegos no pasado e a de todos aqueles que, agora e no futuro –na escritura, nas artes plásticas, escénicas ou no audiovisual- seguen a engrandecer a nosa cultura propia”.

Feijóo concluíu a súa intervención destacando a participación de 91 entidades e 76 profesionais e investigadores e investigadoras na organización da mostra para lograr que a e o visitante dialogue coa pedra e vexa nela unha compoñente da súa identidade.

• Dossier de prensa da exposición