O Consello do Goberno galego acaba de dar o seu visto e prace ao texto do protocolo que a Consellería de Promoción do Emprego e Igualdade ofrecerá a clústeres, asociacións empresariais e outras organizacións sectoriais para que se impliquen no programa Retorna Cualifica Emprego co que se pretende que unhas 400 persoas retornen a Galicia cun contrato indefinido. 

A adhesión ao documento resultará fundamental para atender a demanda de profesionais que precisan as empresas -nos casos en que non se estea a cubrir coas persoas residentes en Galicia- e poder ofrecer eses postos a galegas e galegos retornados que volvan á Comunidade para desenvolver o seu proxecto vital. 

O programa Retorna Cualifica Emprego, que promove a Consellería de Promoción do Emprego e Igualdade, favorecerá o regreso de galegas e galegos no exterior, irá acompañado dun plan personalizado de cualificación e empregabilidade, así como de recursos de formación e a formalización do correspondente contrato de traballo.

Aínda que a Xunta de Galicia prevé destinar a este programa cerca de 4 millóns de euros en 2023, o vencello das entidades a el a través do protocolo non implica ningunha contraprestación económica.

Unha vez formalizada a súa adhesión, clústeres, agrupacións empresariais e outras entidades interesadas, establecerán fórmulas de colaboración para a divulgación e comunicación dos obxectivos do programa coa finalidade de que as empresas coñezan a posibilidade de que as ofertas de emprego que non se cobren por falta de candidaturas no Servizo de Emprego de Galicia, poidan ser cubertas a través de persoas galegas residentes no exterior. 

Invitarase ademais ás entidades representativas dos diferentes sectores adheridas ao protocolo a participar en xornadas, foros e actos de divulgación do programa e habilitarase unha canle específica de referencia no Servizo de Emprego de Galicia á cal poidan dirixirse as firmas interesadas en lanzar as súas ofertas a través do Retorna Cualifica Emprego. Con este protocolo, a Xunta de Galicia pretende amplificar o coñecemento entre o tecido produtivo galego das oportunidades desta iniciativa. 

Retorna Cualifica Emprego é o primeiro dos programas cos que a Área de Promoción do Emprego pretende promover o regreso de galegas e galegos menores de 50 anos residentes no exterior con interese en incorporarse ao mercado laboral na Comunidade. Con estas medidas, o Goberno galego contribúe ademais a atenuar a situación demográfica de envellecemento que afecta á Comunidade e facilita o dereito das persoas galegas e da súa descendencia a regresar a Galicia. 

O programa Retorna Cualifica Emprego forma parte da nova Estratexia Galicia Retorna 2023-26 (ERG2026), que duplica tanto en número de medidas (un cento) como en orzamento (450 M€) á súa predecesora, a Estratexia Retorna 2020, aprobada en 2018 e que mantivo a súa vixencia ata 2022. O documento marca como obxectivo facilitar o regreso á súa terra de 30.000 galegas e galegos do exterior nos vindeiros catro exercicios, o que incrementaría nun 35 % o fluxo actual de retorno ata as 7.500 persoas cada ano. 

Das catro áreas en que incide a Estratexia, a laboral é a que aglutina unha maior cantidade de medidas (37), seguida da educativa (30), a social (25) e a de asesoramento, seguimento, coordinación e control (8). 

A Estratexia Galicia Retorna parte da idea do retorno non só como un dereito, senón como unha vantaxe competitiva para incorporar á sociedade galega persoas de distintos países coa súa formación e experiencia profesional e tamén como unha oportunidade para superar o complexo reto demográfico que ten por diante a nosa comunidade. No marco desta intensificarase o asesoramento tamén ao emprendemento e ao autoemprego das e dos galegos retornados -en especial no rural- e facilitarase a súa participación en accións de inclusión sociolaboral, reforzando a capacitación das habilidades transversais máis demandadas polo mercado e apostando por programas de desenvolvemento persoal da xuventude retornada.