O conselleiro de Emprego, Comercio e Emigración, José González, participou esta mañá nos actos de celebración do XXX Día de Galicia en Castela e León, celebrados no Palacio de Congresos de Salamanca. O evento contou coa participación de grupos folclóricos e corais procedentes de diversos Centros e Casas de Galicia da comunidade, como os de Salamanca, Valladolid, Ponferrada, Miranda de Ebro e Burgos. A xornada festiva continuou cun percorrido e actuación na Praza Maior e rematou cunha recepción institucional no Concello de Salamanca, na que estivo presente o seu alcalde, Carlos Manuel García, ademais da conselleira de Industria, Comercio e Emprego do Goberno de Castela e León, Leticia García.

José González agradeceu a acollida da corporación municipal salmantina e puxo en valor os vencellos de irmandade entre Galicia e Castela e León, subliñando a importancia de símbolos comúns e históricos como o Camiño de Santiago. Así mesmo, recoñeceu o labor das entidades galegas pola súa entrega na preservación da cultura e das tradicións galegas, así como o seu labor fundamental como nexo de unión da comunidade galega residente fóra da súa terra de orixe.

O conselleiro reafirmou tamén o compromiso da Xunta coas entidades galegas no mundo, apostando por un diálogo fluído, unha colaboración activa e un apoio constante que permita continuar fortalecendo a presenza da cultura e das tradicións fóra da nosa terra.