A Xunta de Galicia anima ás e aos galegos universitarios do exterior a que comecen a preparar a documentación necesaria para poder acceder, a partir de febreiro do próximo ano, á nova convocatoria, promovida pola Secretaría Xeral da Emigración, das Bolsas Excelencia Mocidade Exterior (BEME Máster), que chega xa á súa sétima convocatoria.

Con este fin, a Secretaría Xeral da Emigración ten en marcha un servizo de acompañamento e asesoramento personalizado a través da súa páxina web GaliciaAberta – https://emigracion.xunta.gal para facilitar información sobre a documentación que se necesita para optar a estas bolsas, ademais de asesorar no que precisen ás e aos interesados. Trátase dunha campaña de promoción a través desta ligazón que se pode consultar na páxina web da Secretaría Xeral da Emigración.

O Goberno galego oferta así un total de 250 bolsas para tituladas e titulados universitarios galegos e de currículo brillante, residentes no estranxeiro e cunha titulación de grao, licenciatura, enxeñaría ou arquitectura, que poderán cursar estudos de máster nalgunha das tres universidades galegas.

Segundo explica o secretario xeral da Emigración, Antonio Rodríguez Miranda, nestes intres, “estamos xa a traballar para informar a todos os interesados nestas bolsas, animándoos a que comecen a recoller toda a documentación que necesitan para que a teñan lista xa cando abramos a nova convocatoria a comezos do próximo ano”.  

A Xunta continúa así impulsando o retorno de currículos brillantes ao tempo que contribúe á fixación de poboación na Galicia territorial. 

As e os beneficiarios da iniciativa deben ser galegas ou galegos por nacemento ou descendentes por consanguinidade, acreditar un mínimo de dous anos de residencia no Exterior, ter menos de 40 anos e estar admitidos na preinscrición dalgún dos mestrados das universidades galegas.

As bolsas sufragarán viaxe, matrícula, aloxamento e manutención, cunhas contías que oscilan entre os 7.500 e os 12.000 euros dependendo do continente da persoa beneficiaria.