A subdirectora de Comunidades Galegas da Secretaría Xeral da Emigración, Isabel Martínez Pellicer, participou hoxe nun acto celebrado na Universidade de Suíza no que destacou a histórica relación entre Galicia e a colectividade galega asentada neste país, así como o impacto das políticas autonómicas de retorno, que converteron a Galicia nun referente en España e Europa.

Durante a súa intervención, a representante da Xunta subliñou que Suíza foi en 2023 o segundo país do que máis galegos retornaron (983), só por detrás de Cuba, e que a maioría destas persoas (mais do 84%) tiñan entre 18 e 64 anos, o que reflicte o papel esencial do retorno para o reforzo da poboación activa e cualificada de Galicia. “Falamos de galegos con experiencia internacional, formación e capacidade emprendedora, que atopan na súa terra oportunidades reais para desenvolver o seu proxecto vital”, explicou.

A subdirectora lembrou tamén que o vínculo entre Galicia e Suíza segue a ser moi activo grazas ás entidades galegas presentes nas principais cidades helvéticas, que manteñen viva a identidade e as tradicións galegas. “As asociacións foron o fío condutor que permitiu que Galicia nunca deixase de latir en Suíza”, afirmou, agradecendo o labor das directivas e dos socios que continúan a transmitir a cultura galega ás novas xeracións.

No ámbito das políticas públicas, sinalou que máis de 40.000 galegos regresaron dende 2018 grazas á Estratexia Galicia Retorna, que conta con máis de 100 medidas e un investimento total de 450 millóns de euros ata 2026. No caso concreto de Suíza, destacou que preto de medio millón de euros foron destinados nos últimos anos a apoiar o emprendemento e a integración das familias retornadas, ademais de bolsas e programas formativos que facilitan a incorporación da mocidade galega ao sistema universitario e laboral de Galicia.

A representante do Goberno galego rematou sinalando que Galicia “segue a ser terra de emigración, pero tamén de retorno e de acollida”, e que o obxectivo da Xunta é continuar a fortalecer a colaboración coas comunidades galegas en Suíza para transformar o vínculo histórico en novas oportunidades de futuro compartido.