O presidente da Xunta, Alfonso Rueda, asistiu hoxe en Santiago ao encontro Retorno Emprendedor da Rede Programa Merlo para poñer en valor o emprendemento dos galegos e galegas retornados á nosa terra. 

O titular do Goberno galego destacou a importancia do acompañamento ao retornado a través de iniciativas, ferramentas e programas específicos de mentoring que oferta o Goberno galego. Subvencionáronse 700 proxectos de galegos e galegas retornados dos 5 continentes, de máis de 40 países e de todas as idades.  

A Xunta destinou máis de 4 millóns de euros ao Programa Retorno Emprendedor, ao que se lle ten que sumar outro millón máis establecido nos presupostos do próximo ano.  

O presidente da Xunta subliñou que o emprendemento non só xera emprego e riqueza, tamén revitaliza as tradicións e as culturas porque trae consigo ideas frescas e unha mentalidade global. Todos estes elementos, tal e como apuntou, enriquecen o tecido empresarial e a diversidade de perspectivas.  

Alfonso Rueda felicitou a todos os emprendedores e cualificou a emigración como “un acto valente” e retornar como “un dereito”. O Programa Retorna, subliñou “é unha cuestión de xustiza” polo dereito absoluto dos retornados a volver a súa terra e poder retomar nela unha vida de éxitos.  

Tamén agradeceu aos mentores a súa labor de orientación e acompañamento aos retornados no seu camiño de emprendemento, e, en especial, a Fernando Vázquez, director xeral de Imatia, que asistiu hoxe ao acto e compartiu cos asistentes os seus coñecementos e a súa perspectiva.